1Cor 5 | BEF | STEP | Lenali kumu ma lite lama'naka lago nani keheluna: Lenalitoga moko lise'na fato'i Hu'mamofihi mekeheli'ahana bona'magitoga ya'ma sipi foipana huto mehuse'namofihi yana hiti huto huto ni'ibe. Lenalitoga bo moneuba afo'afihi liha'a ni'ibe nelago nokehelube. Yana'mu ya'ma nolube.

1 Corinthians 5

Moko lise nasana'mu huto huto ni'ibe

1 Lenali kumu ma lite lama'naka lago nani keheluna: Lenalitoga moko lise'na fato'i Hu'mamofihi mekeheli'ahana bona'magitoga ya'ma sipi foipana huto mehuse'namofihi yana hiti huto huto ni'ibe. Lenalitoga bo moneuba afo'afihi liha'a ni'ibe nelago nokehelube. Yana'mu ya'ma nolube. 2 To lenali henabe lite ana'ina ya'ma huto huto ni'ina yamofi kumu lenubuya nehinogo lenugufa'mu menekehelibe. Henabe lite lenugufa le'momo tilata nehabe? Lenali bati hite keke'i nelite lenubuya hulata nohina nasana lilata nohina bomofihi ya'ma folagahatiniguti li he'mi etalana ni'ibe. 3 Nani nugufatu foto'i nohuto komopa'niguti yamofihi lenubuya hulata nohina nasana lolo hina bo ai'i kaga ya'ma folagahatinigu nohuto hu tegi huto Sipi Boti Yesuhi gi'alo ka loko hu su hoto ma luto lu nolepube. 4 Lenali Sipi Bo Yesuhi ai bulo ai amuyalo li gehesa hite nehinogo nani molo kehelito komopa'nitu keheli lepinogo 5 ana mokolo bomofi folagahatiniguti he'mi etelete Satahi yanugu malalabe luto nolu lepolobe. Hena'mube? Ya'ma gufa'auba foipa nohina hapa'a Satau le'mo sibi hulenogo to komopa'a li gelehe higo Hu'mau ana bo buto bulenogomo Sipi Bo Yesu Kilisito nehetilina kanagu meha'a minalibe luto yabe.

6 Ana'ina keta'a hiti lite minete lenugufa limo titi nehana yamofihi keheli sibina hulata nohube. Lenali beleti nose'na lolo nehana hapa'a nekehelifiye? Beleti nose'nagu mone yisiti kitili ketele'nauba i tili huto bula ola huto yeye bilina'mu yabe. Ya'ma mokolo bomofihi hapa'a yisiti tegi huto lenali folagahatinigu bula ola huto bati mehibe. 7 Ya hu'ehina'mu yisiti'mu sa sa hite loko hite li he'mi su henogo nebinogo legeya'a laga'a hiti lolo hilo. Lenali ya hilete yisiti nasana meni'ina beleti, Pasa nose'na nalana yupapogu nonotanana hetofa suhi huto minalabe. To hena'mube? Lali lubuto bilatana sipisipi yaga Kilisitohi ya'ma lali foipana'mu yabe luto fili'ehinamo ni'ibe. To ya'mu aiya lali Pasa nose'na nalata yupapogu holata nohuta sipisipi yaga suhi huto nohibe. 8 Yamofihi Kilisitotoga hepito legelo bito minalune luto beleti nose'nagu yisiti meni'ina yamofihi foipana hiti moko lilata yisiti suhi li he'mi su holoto yisiti nasana'a meni'ilina nasana yamofihi eto'ehina hapa'a lito to ka lamana'a legeya'amofihi nasana yamofihi nohuto legelo bito minalune.

9 To nani fayahi mone koyapa'i ma luto koyoto lepi'ohunamo ni'ibe: Lenali kegeiyo hilata nehana bona'i humofa'na hiti meminalo luto lu lepolo'ohuna. 10 Ya'mu nani Hu'mamofihi mekeheli'ahana bona'magi ana'i guminalo'nafi to yogo fe'nohi babu luto lilube lilatanafi to keya ka li gofa huse'nafi lugefa li filata bofi enali kumu melu'ohuna. Enali ya'ma me'i he'miluta yupahi mege'i malalutalo nehana yana'mu enali hiti lali hiti melugu nohutoti nominone. 11 Nani ma luto koyo lepi'ohunamofihi hapa'a ni'ibe: Hu'mamofihi ka nokehelube luto lenalalutinifu moneuba moko foya lito sibina hilifi to gumesilo a'i lolo hilifi nalisalo lugefa nasana lito minalifi to bona'magi enemegeka lilifi to negi nagamitoko humofa'na hilibe, to keya ka i gofa huto humofa'na hilibe, bona'i ya hana'a hiti mino hepito nose'na menalabe luto lu lepolo'ohunamo ni'ibe.

12 Nani fegutoga bona'i nehana enali'i kaga luto lu laga hu epolose'na yamofihi nani foya meni'ibe. To enali fegutoga nehanamagihi foipana'amofihi kaga ya'ma Hu'mau loko huto lilina'mu yabe. Lenalitini folagahatinigu mono ka nekehelina bona'i enali'i foipana'animofihi kaga'amu lilana yamofihi bati hilube'mu hibe. Ya hu'ehina'mu mono bukugu ma lite keye'ahanamo yamofihi kehelite minalo:Foipa bo ai'i he'mi etenogo folagahatinigu memineno.